Беларусы маюць надзвычай каштоўнае багацце – сваю мову. Не ва ўсіх самастойных нацый ёсць такая магчымасць. Прычым гэта вельмі багатая, распрацаваная і ўніверсальная мова, носьбіты якой добра разумеюць многія іншыя славянскія мовы, бо яна мае з імі вельмі цесную сувязь. І ў той жа час яна надзвычай трапна адлюстроўвае мясцовую рэчаіснасць і пачуцці беларусаў. Вось толькі сама мова зараз просіць дапамогі, каб не знікнуць з моўнай карты свету.
Нельга кожнаму шчыраму беларусу без хвалявання чытаць верш А.Гаруна “Мой брат”.
Ты мой брат, каго завуць беларусам,
Роднай мовы сваёй не цурайся,
Як не зрокся яе пад прымусам
Так і вольны цяпер не зракайся.
Дык шануй, беларус, сваю мову, -
Гэты скарб наш на вечныя годы,
За пашану радзімаму слову
Ушануюць нас брацця-народы.
Паважаныя бацькі! Беларусы павінны ведаць сваю родную мову. Таму запрашаю Вас падтрымаць сваіх дзяцей і дапамагчы авалодаць беларускай мовай. Кожную сераду тыдня (можна і кожны дзень) размаўляйце з дзецьмі па-беларуску. Неабходна, каб дзеці чулі не толькі ў школе, але і ў хаце гучанне роднай мовы. Калі Вы самі недасканала яе ведаеце, то разам з дзецьмі бярыцеся за вучобу, чытайце кнігі на беларускай мове, глядзіце беларускамоўныя тэлеперадачы і размаўляйце, размаўляйце па-беларуску! І Вашы дзеці, гледзячы на Вас, з большай ахвотай будуць вывучаць такую родную, такую мілагучную беларускую мову!.
